Pagsusuri ng Tula

Mapanglaw ang mga Ilaw sa CALABARZON

 Pedro R. Ricarte

Kayarian ng Tula

            Ang tula ay nasa malayang taludturan o free verse sapagkat ang bawat taludturan ay walang sinunod na sukat at walang tugma.

Teoryang Pampanitakan

            Ang tulang ito ay pumapaloob sa Teoryang Sosyolohikal. Ang teoryang ito ay nagpapakita ng kalagayan at suliraning panlipunan ng lipunang kinabibilangan ng may akda o ng mga tauhan.Masasalamin sa tula na ang tauhan ay isang magsasaka.

Patunay/Sitwasyon sa Tula

            “Tumanaw siya sa gawing silangan;

            Kaylawak ng lupaing itong pinagyayaman

            Ng marami pang katulad niya

            Ngunit ipinagbibili na ng mga may-ari

            May mga bukid na nasimulang tambakan

            Pero umaagos pa sa mga padaluyan

            Ang patubig ng gobyerno”

            “Wala siyang namumuwangan sa kabuhayang-bansa

            Hindi niya kayang gagapin kung bakit at papaano—

            Nadarama lamang niya—ang malaking panghihinayang

            Pangungulila sa pagkawala ng mga berdeng lupain

            Na kaygandang pagmasdan, kay timyas bungkalin

Ang Babae sa Pagdaralita

Joi Barrios

Kayarian ng Tula

            Ang tula ay nasa malayang taludturan o free verse sapagkat ang bawat taludturan ay walang sinunod na sukat at walang tugma.

Teoryang Pampanitikan

            Ito ay pumapaloob sa teoryang Feminismo at Sosyolohikal. Feminismo sapagkat naipakita sa tula ang kalakasan at mga kakayahan ng isang babae .Sosyolohikal sapagkat naipakita din ang kalagayan at suliraning panlipunan ng lipunang kinabibilangan ng may akda o ng mga tauhan.

Patunay/Sitwasyon sa Tula

Teoryang Feminismo

           

            “Nasa ating mga babae ang pakikibaka !

            Kung paanong sa gabi at araw

            ay wala tayong humpay sa paggawa

            Kung paanong  magkasabay na lumalaban at nag-aaruga

            Matibay ang dibdib pagkat mapagkalinga ang ating pag-ibig

            Sulong at makibaka!

Teoryang Sosyolohikal

            “Babae akong sinasakmal ng kahirapan.

            Kahirapang mistulang

            Ahas sa damuhan,

            Maliksi ang galaw,

            Nagbabadya ang nakasangang dila,

            Makamadag ang kagat.

            Pumupulupot ang ulupong,

            Itong paghihikahos, sa aking katawan,

            At tumatakas ang lakas.”

Sandaang Hakbang Papuntang Malakanyang

Frank Cimatu

Kayarian ng Tula

            Ang tula ay walang sukat subalit may tugma.

Teoryang Pampanitikan

            Ang tulang ito ay pumapaloob sa teoryang Realismo, nagpapakita ito ng  mga karanasang nasaksihan ng may-akda sa kanyang lipunan.Samakatwid ito ay hango sa totoong buhay ngunit hindi tuwirang totoo sapagkat isinasaalang alang ng mat akda ang kasiningan at pagkaepektibo ng kanyan sinulat.

Patunay/Sitwasyon sa Tula

            “Magsasakang

            Nakadala’ ng

            Sundang

            Nagbubulagang

            Peryodistang

            Walang

            Kinikilingang

            Kumikinang

            Hanggang

            Walang

            Itinitimbang

            Ang

            Kasamang

            Kabataang

            Pinunta’ng

            Sasakyang

            Nagwawangwang

            Nagsisigawang:

            “Tang

            Inang…”

            Pinompiyang

            Habang

            Ginigisa ng

            Paratang”